CAST | GAL

ACTUALIDADE

Volver

 

Mans infantís para os bosques da Ribeira Sacra


O CEIP Monforte participa desde hai anos en Voz Natura e esta vez faio cun proxecto que integra múltiples disciplinas co obxectivo único de concienciar da necesidade de coidar os nosos bosques. O proxecto do CEIP Monforte, coñecido nesta localidade como Colexio  Novo, integra diferentes actividades e algunhas delas dan continuidade a experiencias iniciadas anos atrás. Os estudantes deste centro de educación infantil e primaria levan tempo mantendo un xardín e un horto ecolóxico dentro das instalacións do colexio e colaboran na recuperación de viñedos nas beiras do Cabe, o río que atravesa o centro urbano de Monforte.

Coordinado pola profesora Teresa Fernández, o proxecto deste ano leva por título «Bosque  Máxico». Trátase dunha iniciativa multidisciplinar que integra os traballos xa coñecidos pola comunidade escolar deste centro como o xardín e o horto -do que a cociña do colexio aproveita para proporcionarse de materia prima fresca e de primeira calidade-, con outros novos que fan que este proxecto sexa practicamente único. Horto, xardíns, monte, consumo responsable, reciclaxe, limpeza da contorna,  ecopatrullas, reforestación de zonas queimadas... todo iso e algunhas cousas máis é o que traballan os alumnos, e non só nas aulas.

Os responsables deste colexio monfortino explican que para levar a cabo determinadas partes deste programa están en contacto coas comunidades de propietarios dos montes en man común de diferentes parroquias da Ribeira Sacra. De acordo cos veciños que comparten os dereitos sobre estes terreos comunais, os estudantes levan a cabo traballos de reforestación e recuperación dalgunhas áreas forestais degradadas. Nesta tarefa, o colexio e os comuneiros están de acordo coa necesidade de apostar polo uso de especies arbóreas autóctonas.

Entre o que teñen previsto levar a cabo este curso en clase destaca a elaboración dun plan de aproveitamento integral dos bosques, ou a preparación de  plántulas dunha árbore en cada aula. Tamén teñen previsto realizar unha guía para penetrarse nas montañas do sur da provincia de Lugo, que recollerá as principais rutas de sendeirismo xa dispoñibles.

De como evolucionan as múltiples frontes que decidiron abrirse dentro da súa colaboración deste curso co programa Voz Natura, dan conta eles mesmos. Fano a través do programa que retransmiten cada quince días desde Radio Lemos, a súa estación radiofónica.#FaiGaliciaVerde.