CAST | GAL

ACTUALIDADE

Volver

 

Voz Natura prepárase para o próximo curso


Unhas inevitables pingas de frustración percíbense estes días ao falar con profesores que participan en Voz Natura. «Non imos poder desenvolver todo o que planearamos», «Temos o proxecto pola metade» e frases similares describen o parecer xeral. E unha pregunta —tamén xeral— que leva implícita a resposta ou polo menos o desexo: «Pero o próximo curso haberá Voz Natura, verdade?».

Esa resposta é si, por suposto. Radicalmente. Sen ningunha dúbida. Porque aínda queda moito traballo por diante para concienciar e implicar á comunidade escolar de Galicia na recuperación e defensa da natureza, unha natureza que ninguén nega que se mostrou moi xenerosa coa esquina peninsular.

Facendo balance, o prazo de inscricións que se abriu o 1 de febreiro ía pechar o 15 de marzo, pero ao final de ampliou uns días —ata finais— debido ao desaloxo de colexios e o trastorno que iso produciu, o cal implicou que algúns profesores non puidesen enviar a tempo os seus proxectos.

O balance: máis de 420 peticións, unha cifra que mostra, como todos os cursos, a gran implicación dos centros na defensa da natureza e, ao mesmo tempo, que a acollida a esta iniciativa de Voz Natura segue sendo magnífica. E iso que, en teoría, despois de tantos anos (naceu no curso 1997-1998, de maneira que a próxima será a 24 edición) podería pensarse que o interese ía decaer. Os números demostran que en absoluto foi así.

O acerto co tema para o 2020-2021 tamén contribuiría a ese éxito. Porque Galicia enteira envorcarase coa protección e recuperación da contorna natural do Camiño de Santiago, en pleno ano santo compostelán.

Como foi anunciado no seu día, o próximo mes de xuño saberase que colexios recibirán a axuda económica e técnica de Voz Natura, un programa de La Voz de Galicia desenvolto pola Fundación Santiago Rey Fernández-Latorre que conta co patrocinio da Consellería de Medio Ambiente, Territorio e  Vivenda, a Deputación da Coruña, a Fundación Alcoa, O Corte Inglés e a Fundación Ramón Areces.

Hoxe a opción correcta é quedarse na casa. Sen ningunha dúbida. Como tampouco hai dúbida de que a próxima edición de Voz Natura está en marcha. O confinamento terminará e os centros educativos volverán converterse no pulmón do futuro de Galicia. «Regresaremos ás aulas e estaremos con todos eses profesores e alumnos que co seu esforzo e a axuda de Voz Natura fan da vida unha experiencia máis grata». Palabra a Alejandro Díaz, o portavoz do comité científico.